Sáttmáli um nýja sókn í atvinnumálum

Gylfi Arnbjörnsson, forseti ASÍ, segir að með stöðugleikasáttmálanum hafi náðst breið samstaða allra aðila á vinnumarkaði, sveitarfélaga og ríkis um átak til að endurreisa efnahagslífið með fjölþættum aðgerðum.

„Þetta er yfirlýsing um víðtæka samvinnu við að koma þjóðinni út úr núverandi kreppuástandi. Þessar aðgerðir sem við ætlum að sameinast um, eiga að skapa skilyrði fyrir nýrri sókn í atvinnumálaum og þar með bættum lífsskilyrðum til framtíðar, okkur öllum til heilla," segir Gylfi á vef ASÍ og bætir við að forysta Alþýðusambandsins sé sérstaklega ánægð með að hafa náð að framlengja kjarasamning sambandsins sem feli í sér hækkanir fyrir þá tekjulægstu.

Gylfi vonar að með aðgerðunum verði hægt að koma hreyfingu á hjól atvinnulífsins með lækkun vaxta og samkomulagi um að greiða götu stórframkvæmda og leggja grunn að samkomulagi við lífeyrissjóðina um fjármögnun aukinna framkvæmda.

Þá segir Gylfi ljóst að þjóðin standi frammi fyrir mjög alvarlegri í stöðu í fjármálum ríkissjóðs. Finna verði leið til að minnka halla ríkissjóðs um 180 milljarða eða um þriðjung af umsvifum ríkisins á næstu 3-4 árum.

„Með samkomulagi við ríkisstjórnina náðist ákveðin varnarsigur með því að draga verulega úr niðurskurði í heilbrigðis-, velferðar- og menntakerfinu og þrátt fyrir að ríkistjórnin muni leggja verulegar byrgðar á heimilin í formi skattahækkana tókst okkur að koma í veg fyrir að enn lengra yrði gengið í þá átt með því að fá inn ákveðið þak á þann þátt," segir Gylfi.