Ákærður fyrir glæp gegn mannkyninu

Alþjóðastríðsglæpadómstóllinn í Hollandi sendi í dag frá sér ákæru á hendur Omar al-Bashir, forseta Afríkuríkisins Súdans, fyrir stríðsglæpi og glæpi gegn mannkyninu í Darfúr-héraði. Dómstóllinn ákvað hins vegar ekki að ákæra al-Bashir fyrir þjóðarmorð. Forsetinn neitar sök. Þetta er í fyrsta sinn sem stríðsglæpadómstóllinn gefur frá sér ákæru á hendur sitjandi þjóðarleiðtoga.

Sameinuðu þjóðirnar telja að um 300 þúsund manns hafi fallið í átökum uppreisnarmanna og stjórnarhers í Darfúr og sex milljónir manna séu á vergangi.

Saksóknari segir al-Bashir bera ábyrgð á morðum, nauðgunum og pyntingum í héraðinu auk þess sem hann sé ábyrgur fyrir að fjölmargir íbúar hafi verið fluttir nauðugir frá heimilum sínum um leið og öllum eigum þeirra hafi verið rænt. Æðstu ráðamenn í Súdan hafi skipulagt árásir á þjóðarbrot í Darfúr héraði en ekki sé hægt að sanna að um þjóðarmorð hafi verið að ræða. Stríðsglæpadómstóllinn hefur farið þess á leit við stjórnvöld í Súdan að forsetinn verði þegar framseldur.

Óttast er að til átaka komi milli stuðningsmanna forsetans og andstæðinga hans í Khartoum, höfuðborg Súdans, vegna ákærunnar.