Allardyce ætlar að fá leikmenn fljótt

Sam Allardyce ætlar sér að styrkja leikmannahóp Blackburn sem allra fyrst til að takast á við baráttuna í ensku úrvalsdeildinni sem er framundan.

Allardyce tók við liði Blackburn í síðasta mánuði og hefur ekki farið leynt með áætlanir sínar um að styrkja leikmannahópinn nú í janúar.

Sergio Peter, leikmaður Blackburn, er sagður á leið til Sparta Prag í Tékklandi og þá er félagið sagt hafa áhuga á El-Hadji Diouf, leikmanni Sunderland.

„Ég á von á því að fá nýjan leikmann sem allra fyrst," sagði Allardyce í samtali við heimasíðu Blackburn. „Ég hef fyrst og fremst einbeitt mér að því að bera kennsl á þá leikmenn sem við viljum fá í samráði við formann félagsins."

Hann segist ætla að halda sínum bestum leikmönnum, þeirra á meðal Roque Santa Cruz sem hefur verið orðaður við Manchester City.

„Þeir leikmenn sem við erum með eru nægilega góðir til að koma okkur úr þeim vandræðum sem við erum í," sagði Allardyce. „En hvaða stjóri sem er myndi vilja fá leikmann sem myndi koma til með að bæta leikmannahópinn."

„Ef okkur tækist að gera það myndi það virka sem mikil lyftistöng fyrir liðið allt."