Óhugnalegt yfirstéttarmorð í Frakklandi

Lögreglan í Bretlandi leitar Ian Griffins auðjöfurs sem grunaður er um að hafa barið kærustuna sína til bana á lúxushóteli í París fyrir fáeinum dögum.

Lögreglumenn í Cheshire hafa fundið svarta Porsche 911 bifreið sem talið er að Ian Griffin hafi notað til að flýja af Hótel Le Bristol í París. Þerna á hótelinu fann hina látnu, Kinga Legg, á baðherbergi parsins. Porsche bifreiðin fannst í Warrington i gær, hverfi þar sem Griffin ólst upp, og er það talin vísbending um að hann hafi mögulega svipt sig lífi.

Samkvæmt frásögn Sky fréttastöðvarinnar er lögreglan í Cheshire sannfærð um að það var Griffin sem ók bílnum frá París til Englands en allt er á huldu um afdrif hans eftir að hann yfirgaf bílinn. Þá rannsakar lögreglan hvort einhverjar mögulegar millifærslur eða úttektir hafi verið af bankareikningum Griffins og kærustunnar hans.