Danskir foreldrar stela af barnaspítulum

Leikföng, hitamælar og tölvuleikir hverfa í stórum stíl af barnadeildum spítalanna. Á sjúkrahúsinu í Næstved ver barnadeildin 8 þúsund dönskum krónum, eða röskum 160 þúsund krónum, árlega til þess að kaupa nýja tölvuleiki. Ástæðan er sú að þeir gömlu hverfa jafnóðum, er haft eftir Anette Østerkjerhuus í 24 tímum

„Eina ástæðan fyrir því að við höfum efni á að kaupa nýja leiki er að við fáum framlög frá einkaaðilum. Annars myndum við aldrei hafa fjármagn í það," segir Annette við blaðið. Hún segist sjálf hafa séð til foreldra stinga leikföngum í veskið sitt. Hún hafi gert athugasemd við þessa hegðun og þá hafi viðkomandi lagt frá sér leikfangið.

Á sjúkrahúsinu í Hvidovre hefur starfsfólk jafnframt orðið vart við þetta vandamál, eftir því sem Stine Fjelstervang, yfirhjúkrunarfræðingur fullyrðir. „Það hverfa bleyjur, hitamælar, föt og leikföng. Við erum farin að læsa dýru leikföngin inni, eins og tölvuleikina. Og þegar að við lánum leikina, fylgjumst við grannt með hver fær þau lánuð," segir hún.

„Það virðist svo vera sem að sumir foreldrarnir telji að það sem sé í opinberri eigu sé þeirra eign," segir Stine Fjelstervang.