Obama kominn í forsetagír

Barack Obama, verðandi forseti Bandaríkjanna, og Joe Biden, verðandi varaforseti, komu ásamt fjölskyldum sínum til Washington-borgar með lest á laugardag til að undirbúa sig fyrir embættistöku Obama á þriðjudag.

Athöfnin þykir táknræn en goðsagnarkenndi forsetinn Abraham Lincoln kom til borgarinnar með sama hætti fyrir 148 árum. Þegar Lincoln kom til borgarinnar var þrælastríðið handan við hornið. Obama stendur frammi fyrir litlu minni erfiðleikum; efnahagslíf landsins er í miklum vanda og hann þarf að glíma við gríðarlegan viðskiptahalla auk þess sem hann hefur einsett sér að binda enda á Íraksstríðið.

Þeir Obama og Biden lögðu krans á leiði óþekkta hermannsins í Arlington-kirkjugarðinum í Washington í gærmorgun en sátu stjörnum prýdda risatónleika um kvöldið.

Hátíðahöldum í tengslum við embættistöku Obama lýkur á miðvikudagsmorgun með messu. Kirkjuhald sem þetta á rætur að rekja allt aftur til 1789 þegar George Washington, fyrsti forseti landsins, settist í forsetastól. - jab