Íranir skutu háþróaðri eldflaug á loft

Íranar skutu í morgun á loft nýrri háþróaðri eldflaug sem dregur um 2000 kílómetra eða allt til Ísraels og bandarískra herstöðva við Persaflóa. Líklegt er að tilraunaskotið veki áhyggjur Vesturveldanna um hernaðarlegan metnað ráðamanna í Teheran.

Um er að ræða eldflaug af gerðinni Sejil 2 sem hægt er að skjóta frá jörðu að skotmarki á jörðu nirði í allt að 2000 kílómetra fjarlægð. Mahmoud Ahmadinejad, Íransforseti, tilkynnti um þetta í útvarpsávarpi í morgun.

Nýja eldflaugin dregur þannig nærri jafn langt og önnur írönsk tegund eldflauga Shahab 3 sem áður hafa verið gerðar tilraunir með. Nýja eldflaugin getur þannig náð til skotmarka í Ísrael og herstöðva Bandaríkjamanna við Persaflóann.

Tilraun var gerð með eldri útgáfu Sejil eldflauga í nóvember síðastliðnum og sögðu ráðamenn í Teheran þá að þeir væru nú það vel búnir að þeir gætu varið Íran fyrir árásum.

Tilkynningin um tilraunaskotið í morgun er talin valda áhyggjum meðal ráðamanna á Vesturlöndum um hernaðarlegan metnað stjórnvalda í Íran. Bandaríkjamenn og bandamenn þeirra telja að ráðamenn í íslamska lýðveldinu séu að leita leiða til að smíða kjarnorkusprengjur. Ráðamenn í Teheran hafa neitað því.

Tilraunaskotið telja margir vera hluta af kosningabaráttu Ahmadinejads forseta en forsetakosningar verða í Íran í næsta mánuði. Tilkynnt var í morgun hverja kjörstjórn hefði valdið í framboð úr hópi 450 umsækjanda, en þar á meðal voru 45 konur. Frambjóðendurnir eru fjórir, allt karlmenn.

Ahmadinejad sækist eftir endurkjöri. Tveir umbótasinnar bjóða sig einnig fram, þeir Mir-Hossein Mousavi, fyrrverandi forsætisráðherra, og Mehid Karoubi, fyrrverandi þingforseti. Fjórði frambjóðandinn er Mohsen Rezai, fyrrverandi yfirmaður sérsveitar íranska hersins.

Andstæðingar Ahmadinejads í kosningunum gagnrýna hann allir fyrir slaka efnahagsstjórn og það að hann hafi lýst því yfir opinberlega að helför gyðinga sé goðsögn. Frambjóðendurnir þrír vilja allir milda utanríkisstefnu Írans og leita sátta við erlend ríki sem Íranar hafa deilt við.