Ferguson: Tevez breytti leiknum

Sir Alex Ferguson, stjóri Man. Utd, var að vonum afar sáttur með sigurinn í dag og hann hrósaði Argentínumanninum Carlos Tevez sérstaklega eftir leik.

„Við vorum of hægir í fyrri hálfleik og þurftum að keyra upp hraðann. Tevez sá um það og breytti leiknum. Hann kom hinum í liðinu almennilega í gang," sagði Ferguson.

„Við urðum að skora snemma og við vorum svolítið heppnir að fá þetta víti. Svona er boltinn stundum. Í bikarleiknum duttum við út því við fengum ekki víti sem við áttum að fá," bætti Ferguson við.

Harry Redknapp, stjóri Spurs, var brjálaður yfir vítinu og sagði að það hefði algjörlega breytt gangi leiksins.