Guantánamo lokað innan árs

 Fyrsti dagur Baracks Obama í embætti Bandaríkjaforseta var annasamur. Hann kallaði saman helstu ráðgjafa sína í bæði efnahagsmálum og hermálum til að fjalla um þau erfiðu verkefni, sem blasa við strax í byrjun embættistíðar hans.

Fyrsta ákvörðun Obama í embætti var reyndar tekin strax á þriðjudaginn, þegar hann bað dómara í sérdómstólum Bandaríkjahers á Kúbu um að fresta öllum réttarhöldum yfir föngunum í herstöð Bandaríkjanna við Guantánamo-flóa í 120 daga. Sá tími verður væntanlega notaður til að koma málefnum þessara fanga í aðra farvegi.

Frestunin „hefur í raun þau áhrif að stöðva réttarhöldin, líklega fyrir fullt og allt“, sagði William Kuebler, lögmaður eins fanganna.

Aðstandendur sumra fórnarlamba hryðjuverkanna 11. september sögðust andvígir allri frestun á réttarhöldunum, en mannréttindasamtök fögnuðu þessu.

Í gær bárust síðan fréttir af því að Obama hefði í hyggju að loka þessum umdeildu fangabúðum innan árs.

Strax í gærmorgun hringdi Obama í Mahmoud Abbas, forseta Palestínustjórnar, til að lýsa yfir eindregnum vilja sínum til að vinna að friði fyrir botni Miðjarðarhafs. Síðar um daginn hringdi hann í Ehud Olmert, forsætisráðherra Ísraels, í sömu erindagjörðum.- gb