Úkraínustjórn fagnar sigri

Úkraínustjórn fagnaði í gær sigri á Rússum í gasdeilunni, sem varð til þess að skrúfað var fyrir gas til Evrópuríkja í tvær vikur.

Júlía Tímósjenkó, forsætisráðherra Úkraínu, segir að náðst hafi mjög hagstæðir samningar við Rússa. Rússar náðu því fram að gasverð til Úkraínu hækkar nokkuð, en á móti fá Úkraínumenn hærri greiðslur fyrir flutning á gasi til Evrópuríkja um gasleiðslur landsins.

„Það er mjög erfitt að fagna því sem aldrei hefði átt að gerast,“ sagði hins vegar José Manuel Barroso, forseti framkvæmdastjórnar Evrópusambandsins, á þriðjudag þegar gas tók að streyma til Evrópusambandsríkja frá Rússlandi í gegnum leiðslur Úkraínu.

Hann segir gasskortinn síðustu tvær vikurnar sýna að Evrópusambandið verði að fjárfesta í eigin orkuöryggi. Ekki sé hægt að treysta Úkraínumönnum til að koma gasinu til skila.

Sum þeirra Evrópuríkja, sem bjuggu við gasskort meðan Úkraínumenn og Rússar deildu, hafa hótað lögsókn gegn báðum löndunum til að fá skaðabætur.

Um fjórðungur af því gasi, sem notaður er í Evrópusambandsríkjum, kemur frá Rússlandi, og um 80 prósent af gasinu frá Rússlandi berst í gegnum úkraínskar gasleiðslur.- gb