Drógu bátskrifli flóttamanna út á haf

Thailenski sjóherinn er sakaður um að hafa dregið nokkur bátskrifli með tæplega eittþúsund flóttamönnum á haf út og skilið þá þar eftir. Í bátunum var fólk sem kallar sig Rohingya og kemur frá Burma. Þar er fólkið ekki viðurkennt sem minnihlutahópur og þúsundir hafa flúið land undanfarna áratugi.

Mannréttindasamtök Rohingya fólksins segja að í síðasta mánuði hafi 992 mann reynt að komast í nokkrum bátum til Malasíu þar sem yfir 14 þúsund Rohingyar eru viðurkenndir sem flóttamenn.

Bátarnir fóru nálægt ströndum Thailands og því er haldið fram að thailenski sjóherinn hafi dregið þá langt á haf út og skilið þá þar eftir.

Sumir bátanna hafi verið vélarvana og fólkið haft lítið vatn og mat. Þeir sem komust lífs af hafa sagt fréttamönnum Reuters í Indónesíu og indversku lögreglunni á Andamaneyjum að um 550 flóttamannanna hafi látið lífið.

Thailensk yfirvöld neita því að hafa beitt nokkra flóttamenn harðræði.