Minntust falls Rauðu khmeranna

Þúsundir Kambódíumanna minntust þess í gær er þrjátíu ár voru liðin frá falli Rauðu khmeranna og leiðtogans Pol Pot.

Það var árið 1975 sem hinir illræmdu kommúnísku skæruliðar Rauðu khmerarnir hrifsuðu til sín völdin í Kambódíu undir forystu leiðtogans Pol Pot og hófu þjóðfélagsbyltingu sem lyktaði nánast með þjóðarmorði. Fjórðungur Kambódíumanna lá í valnum eftir harðræði, hungur, vosbúð eða beinlínis aftökur þegar skelfingartímabilinu lauk í janúar 1979.

Pol Pot gaf út þá yfirlýsingu þegar hann settist á valdastól að nú væri árið 0 runnið upp og samfélagið skyldi hreinsað. Sú hreinsun fólst í því að borgir landsins voru tæmdar og íbúunum þrælað út á hrísgrjónaökrum Pots þar sem vinnudagurinn hófst klukkan fjögur á morgnana og lauk klukkan tíu að kvöldi. Þar eru komnir hinir frægu akrar dauðans eða killing fields sem kvikmynd Rolands Joffé frá 1984 dró nafn sitt af.

Allir sem óæskilegir þóttu í samfélagi khmeranna voru drepnir, til dæmis menntafólk, og bannað var að tala erlend tungumál. Helmingur 425.000 Kínverja, sem bjuggu í Kambódíu, hvarf. Víetnamar réðust að lokum til atlögu við Pol Pot á jóladag 1978 og tókst að steypa honum af stóli á hálfum mánuði. Síðasti hópur Rauðu khmeranna gafst upp árið 1998.