Ísing orsakaði hugsanlega flugslysið í New York

Ekki er útilokað að mikil ísing hafi valdið að því bandarísk farþegavél hrapaði á íbúðarhús í New York ríki á fimmtudaginn. Flugvélin,sem var að gerðinni Bombardier Dash átta 400 skall til jarðar á íbúðarhús í úthverfi Buffaloborgar síðastliðið fimmtudagsköld með þeim afleiðingum að fimmtíu létu lífið.

Örlítil snjókoma var á slysstað og vitni segjast hafa heyrt snark og torkennileg hljóð í flugvélinni áður en hún hrapaði.

Fulltrúi bandarískra flugmálayfirvalda greindi frá því á blaðamannfundi í morgun að flugmenn vélarinnar hafi kvartað yfir mikilli ísingu á vængjum vélarinnar stuttu fyrir slys.

Flugmennirnir óskuðu einnig eftir því að fá lækka flugið úr 16 þúsund fetum í 12 þúsund fet vegna mikillar þoku. Þá hefur rannsókn leitt í ljós að afísingarbúnaður vélarinnar var í gangi þegar hún skall til jarðar.

Vélin var í aðflugi að flugvellinum í Buffalo þegar hún hvarf af ratsjá. Björgunarsveitir eru enn að störfum á slysstað.