Fjármálaráðherraefni Obama klúðraði skattaskýrslu

Timothy Geithner, tilvonandi fjármálaráðherra í ríkisstjórn Baracks Obama, gerði mannleg mistök þegar hann fyllti út skattaskýrslu sína, að mati Roberts Gibbs tilvonandi talsmanns Hvíta hússins. Gerðar hafa verið athugasemdir við greiðslur Geithners til húshjálpar sem starfaði eitt sinn á heimili hans.

Gibbs fullyrðir að mistökin geri Geithner ekki vanhæfan til að taka við embætti fjármálaráðherrra. Aftur á móti gera fulltrúar Repúblíkanaflokksins í fjárlaganefnd öldungadeildar bandaríkjaþings athugasemdir við málið og telja að Geithner sé hugsanlega vanhæfur.

Geithner starfaði sem bankastjóra Seðlabanka New York ríkis þegar Obama tilkynnti formlega í nóvember að hann ætlaði að skipa hann sem næsta fjármálaráðherra Bandaríkjanna.

Barack Obama tekur við sem forseti Bandaríkjanna næstkomandi þriðjudag, 20. janúar.