Eyddu milljón í eitt sælgætisbréf

Breska unglisstúlkan Larissa Wilkinson slapp með skrekkinn þegar dómari bjargaði henni frá að greiða 75 punda sekt, andvirði tæplega 16.000 króna, fyrir að henda rusli út um bílglugga. Raunar gerði dómarinn gott betur en það - hann hellti sér yfir saksóknarann í málinu.

Larissa hafði að eigin sögn lent í því að sælgætisbréf í bílnum hennar fauk út um gluggann án þess að hún fengi við ráðið. Opinber starfsmaður varð vitni að því og Larissa fékk því ofangreinda sekt senda heim til sín.

Larissa ákvað að borga ekki sektina. Henni fannst hún ósanngjörn og hafði takmarkaðar tekjur til að standa af henni straum. Yfirvöld ákváðu því að fara með málið fyrir dóm.

Það var svo fyrir dómi sem dómarinn Roger Scott stöðvaði málið. Hann sagði afar illa farið með skattfé að draga stúlkuna inn í dómsal fyrir það eitt að missa rusl út úr bíl, en kostnaður vegna málsins er talinn vera um fimm þúsund pund, andvirði um milljónar króna.

„Þetta er mest óviðeigandi málshöfðun sem ég hef nokkru sinni séð og stórkostleg sóun á fé útsvarsgreiðenda," sagði dómarinn. Að lokinni afgreiðslu málsins sagðist dómarinn vona að stúlkan hefði átt góðan dag í réttarsalnum og sleppti henni við sektina.

Stúlkan var að vonum afar ánægð með dómarann sem málinu var úthlutað.

Greint var frá þessu á fréttavef The Sun.