Myrti tvö börn og fóstru á dagvist

Íbúar í bænum Dendermonde í austurhluta Belgíu eru harmi slegnir eftir að ungur maður réðst inn á dagvist barna í borginni í gær vopnaður hnífi. Hann myrti þar tvö ungabörn og fóstru þeirra og særði tólf til viðbótar.

Dendermonde er um þrjátíu kílómetrum norðvestur af Brussel. Í dagvistinni eru börn þriggja ára og yngri í gæslu. Maðurinn sem var handtekinn í gær er tvítugur að sögn lögreglu. Hann mun hafa hringt dyrabjöllu á dagvistinni og sagst þurfa upplýsingar frá starfsmanni. Þegar opnað var fyri honum dró hann upp stóran hníf. Hann hafði áður málað andlit sitt í hvítum og svörtum lit að því er talið er svo verr gengi að bera kennsl á hann eftirá.

Tuttugu og eitt barn og fóstrur þeirra voru á dagvistinni þegar árásin var gerð. Börnin tvö sem voru myrt voru sex og níu mánaða gömul. Ein fóstra var einnig myrt. Tíu börn eru særð og tveir fullorðnir.

Maðurinn er í haldi lögreglu og verður áfram yfirheyrður í dag.

Að sögn lögreglu er maðurinn belgískur og íbúi í Dendermonde. Hann mun ekki af erlendum uppruna eins og í fyrstu var talið. Lögregla vísar á bug sögusögnum um að ódæðismaðurinn hafi sloppið af hæli fyrir geðsjúka. Hann mun ekki hafa verið undir áhrifum áfengis eða eiturlyfja þegar morðin voru framin.

Maðurinn mun enn ekki hafa sagt lögeglu neitt um glæpinn og neitað að svara spurningum um ódæðin.

Talsmaður dagvistarinnar segir manninn ekki hafa nokkur tengsl við hana svo vitað sé.