Rændu feðga dulbúnir sem pizzasendlar

Ráðist var inn á heimili feðga í danska bænum Skibby laust eftir miðnætti í nótt, þeir bundnir og heimilið rænt verðmætum. Faðirinn er rúmlega fertugur en sonur hans fjögurra ára og voru ræningjarnir tveir. Þeir sögðust vera pizzasendlar þegar þeir hringdu dyrabjöllunni og hélt annar þeirra meira að segja á pizzakassa til að styðja þá skýringu. Faðirinn taldi mennina vera að fara í ranga íbúð og hugðist leiðrétta misskilninginn en sá þá hvar blikaði á hníf og svo skipti engum togum að mennirnir bundu þá feðga og létu greipar sópa. Lögreglu hefur ekki tekist að hafa hendur í hári mannanna en hefur þó fengið greinargóða lýsingu á þeim.