Krónprins Dana setti umhverfis- og orkuráðstefnu í Chicago

Það er auðvelt að sameina hagvöxt, atvinnusköpun og umhverfisverndarstjórnmál, sagði Friðrik krónprins Danmerkur þegar að hann opnaði umhverfis- og orkuráðstefnu í Chicago í Bandaríkjunum í dag.

„Græn orka getur skapað ný tækifæri á markaði," sagði krónprinsinn við opnun ráðstefnunnar, sem var haldin í menningarmiðstöð í Chicago. Friðrik hélt til Bandaríkjanna í gær ásamt eiginkonu sinni og gert er ráð fyrir að þau dvelji þar í viku.

Richard M. Daley borgarstjóri í Chicago var einnig á meðal ráðstefnugesta. Hann sagði að Chicago hefði ávallt reynt að vera í fararbroddi í umhverfisvernd og borgin hefði farið af stað með umhverfisverndaráætlun í fyrra. Hann sagði að Danir og Chicagobúar ynnu því að sama tilgangi.