Geimferjan getur ekki lent í Flórída

Geimferjan Atlantis hefur enn ekki getað lent í Flórída vegna veðurs. Hún er nú búin að vera í geimnum tveim sólarhringum lengur en áætlað var. Í Flórída er lágskýjað og rok og rigning.

Geimförunum er víst slétt sama, þeim þykir svo gaman að dóla sér á braut umhverfis jörðina. Þeir þurfa heldur ekki að hafa neinar áhyggjur af eldsneyti eða vistum, þar sem gert er ráð fyrir slíkum töfum.

Smávægilegar skemmdir urðu á hitaskildi Atlantis í flugtakinu en þær eru ekki taldar ógna öryggi ferjunnar. Sjö geimfarar eru um borð. Tilgangur ferðarinnar var að gera við stjörnusjónaukann Hubble, sem er á braut um jörðu.