Býflugnaskortur ógnar gróðri jarðar

Vísindamenn hafa miklar áhyggjur af því hversu býflugum og öðrum skordýrum sem bera frjó á milli plantna hefur fækkað.

Loftslagsbreytingar eins og hlýrri vetrar og vætusamari sumur hafa til dæmis valdið því að býflugum í Bretlandi hefur fækkað um tíu til fimmtán prósent á síðustu tveim árum.

Í Bandaríkjunum kveður svo rammt að býflugnaskorti að það er orðin stór atvinnugrein fyrir býflugnaræktendur að fara með bú sín á milli fylkja til þess að bera frjókorn á milli.

Ef þessi þróun heldur áfram getur það haft geigvænlegar afleiðingar fyrir gróður jarðar. Og jarðarbúana sem lifa á honum.