Samdráttur í Valentínusargjöfum milli ára

Er það virkilega hugurinn sem gildir? Bandarískar turtildúfur komast að því í eitt skipti fyrir öll eftir hálfan mánuð en þá rennur hinn rómaði dagur elskenda upp sem kenndur er við heilagan Valentínus.

Samkvæmt könnun sem samtök bandarískra smásala létu framkvæma lækkar meðalupphæðin sem rómantískir neytendur hyggjast verja í elskuna sína úr 123 dollurum í 103 milli ára. Margir þeirra sem þátt tóku í könnuninni ætla að leggja gjafir alveg í salt að þessu sinni og leggja þess í stað áherslu á að eiga notalega stund saman, stundum verður slíkt hreinlega ekki metið til fjár.

Hefðin er þó lífseig og um það bil helmingur fólks ætlar að láta það eftir sér að fara út að borða og rúmur þriðjungur mun gefa jurtir í sellófani. Reyndar er áætlað að Bandaríkjamenn muni eyða 14,7 milljörðum dollara í tilefni Valentínusardagsins sem hljómar ekkert sérstaklega kreppulega og ef út í það er farið má spyrja áleitinna spurninga um tengsl gjafakaupa við uppreisnargjarnan biskup á 3. öld sem skrifaði bréf til blindrar dóttur fangavarðar á meðan hann beið aftöku sinnar í klefa. Það bréf mun Valentínus þessi hafa skrifað 14. febrúar.