Hringdi barnið inn veikt vegna fátæktar

Foreldri sautján ára drengs, sem hefja átti nám í menntaskóla, hringdi hann inn veikan fyrsta daginn. Ekki voru til peningar til að kaupa námsbækur og skólavörur handa honum.

Foreldrið er öryrki með þrjá syni á skólaaldri á framfæri. Það leitaði á náðir Fjölskylduhjálpar Íslands og fékk þaðan 20 þúsund krónur til bókakaupa, auk matvæla. Fjölskyldan hafði einnig fengið fimmtán þúsund krónur frá Hjálpar­starfi kirkjunnar til bókakaupa. Henni hafði hins vegar verið synjað um aðstoð frá Félagsþjónustunni í Reykjavík, á grundvelli þess að þar sem foreldrið er öryrki sé það ekki á framfæri félagslega kerfisins.

Samanlagðir duga styrkirnir ekki fyrir námsbókum og skólavörum allra drengjanna. Nemandi í framhaldsskóla getur gert ráð fyrir að greiða 50 til 60 þúsund krónur fyrir skólabækur.

Ásgerður Jóna Flosadóttir, formaður Fjölskylduhjálpar Íslands, segir að hvorki matur né mjólkurdropi hafi verið til á heimili fjölskyldunnar þegar hún leitaði til Fjölskylduhjálparinnar. Hún segir ekki nýtt að fólk með lítið á milli handanna leiti til hjálparsamtaka eftir aðstoð við skólabyrjun. Sá hópur hafi hins vegar stækkað til muna og þeir sem höfðu það slæmt áður hafi það enn verra í dag. „Við höfum þurft að synja fólki um aðstoð vegna námsbókakaupa, því við verðum að eiga fyrir mat vikulega. En þegar maður fær eins hrikalegt dæmi og þetta verður manni um og ó.“

Saga fjölskyldunnar kemur heim og saman við orð Þórhalls Heimissonar, prests í Hafnarfjarðarkirkju, sem vakti athygli á málinu í færslu á bloggsíðu sinni. Þar segist hann hafa átt erfið samtöl við fólk sem geti ekki látið börn sín byrja í skóla, þar sem ekki séu til peningar fyrir námsbókum og skólavörum.

Katrín Jakobsdóttir menntamálaráðherra segist taka fréttir af brottfalli nemenda úr skóla sökum fátæktar foreldra mjög alvarlega. „Við erum ekki búin að fá mynd af því hvað eru mikil brögð að þessu, þar sem skólasetningar voru á fimmtudag og föstudag. En við munum fylgjast vel með þessu,“ segir Katrín. Hún segir að þegar séu einhver úrræði í boði fyrir nemendur í þessari stöðu. Skoðað verði , í samstarfi við félagsmálayfirvöld, hvort nauðsyn beri til að efla þau.

holmfridur@frettabladid.is