Páfagarður gagnrýnir bannfæringu á 9 ára stúlku

Páfagarður hefur nú blandað sér í mál brasilisku móðurinnar sem var bannfærð fyrir að hjálpa níu ára gamalli dóttur sinni að komast í fóstureyðingu. Læknarnir sem framkvæmdu fóstureyðinguna voru einnig bannfærðir. Telpan gekk með tvíbura eftir að stjúpfaðir hennar nauðgaði henni. Biskuparáð Brasilíu hefur nú afturkallað bannfæringuna.

Rino Fisichella sem veitir forstöðu vísinda- og siðanefnd Páfagarðs segir í viðtali við dagblað Páfagarðs að ekki hefði einusinni átt að láta sér detta í hug bannfæringu í þessu máli. Líf litlu stúlkunnar hafi verið það eina sem máli skipti. Læknar sögðu að hún myndi ekki lifa það af að ganga með og eiga tvíburana.