Shinawatra hvetur til stillingar

Thaksin Shinawatra, fyrrverandi forsætisráðherra Taílands, hvetur stuðningsmenn sína til að sýna stillingu og biður konung landsins um að leysa þær deilur sem blossað hafi upp í taílenskum stjórnmálu. Hann segist ekki geta fjármagnað endurkomu í taílensk stjórnmál að þessu sinni.

Til óeirða kom í Taílandi um páskahelgina þegar stuðningsmenn Shinawatra kröfðust afsagnar sitjandi stjórnar. Hún komst til valda seint á síðasta ári eftir að ríkisstjórn skipuð bandamönnum Shinawatra og ættingjum hrökklaðist frá völdum vegna mótmæla og dóms um kosningasvik. Shinawatra er í sjálfsskipaðri útlegð en hann á yfir höfði sér ákværur í heimalandinu fyrir fjársvik og spillingu.

Shinawatre hefur farið þess á leit við Bhumipol konung Taílands að hann beiti sér í þeirri deilu sem nú sé komin upp. Átök muni aðeins magnast ef hinn dáði konungur taki ekki á málinu.

Shinawatra var sviptur taílensku vegabréfi sínu eftir að óeirðirnar um síðustu helgi blossuðu upp. Stjórnvöld í Níkaragva hafa gefið út vegabréf í hans nafni. Hann hafi verið skipaður sem sérlegur sendifulltrúi landsins en honum hafi verið falið að laða erlenda fjárfesta að Níkaragva.