Vinstristjórn líkleg á Grænlandi

Þingkosningar fóru fram á Grænlandi í gær. Kosningarnar voru þær síðustu sem fram fara áður en Grænlendingar öðlast aukið sjálfstæði 21. júní.

Samkvæmt skoðanakönnunum mun vinstriflokkurinn Inuit Ataqatigiit sigra í kosningunum.Í nýlegri skoðanakönnun fékk flokkurinn 44 prósent atkvæða, en núverandi ríkis­stjórn jafnaðarmannaflokksins Siumut og íhaldsflokksins Atasut fékk 38 prósent. Siumut hefur verið við völd í þrjátíu ár. Alls eru sex flokkar í framboði til þingsins, sem 31 þingmaður fær sæti á. Nærri 39 þúsund manns höfðu kosningarétt í kosningunum í gær.

Hneykslismál hafa verið áberandi í aðdraganda kosninganna, en þó nokkrir stjórnmálamenn hafa verið fundnir sekir um að hafa notað almannafé til að fjármagna einkaneyslu sína. Þeirra á meðal er fyrrum ráðherra í Siumut-flokknum, Jens Napaattooq, sem var dæmdur í fjögurra mánaða fangelsi.

Grænland fær aukið sjálfstæði og stjórn yfir innanríkismálum 21. júní. Þá verður grænlenska opinbert tungumál. - þeb