Landspítalinn naut ekki útgjaldaþenslu

Landspítalinn hefur setið eftir í fjárveitingum borið saman við þróun heildarútgjalda til annarrar heilbrigðisþjónustu í landinu á undanförnum árum. Framlög til Landspítalans hafa dregist saman um þrjú prósent frá árinu 2001, samkvæmt tölum Hagstofu Íslands. Á sama tíma hækkaði framlag til heilbrigðismála í heild, reiknað án Landspítalans, um tæp sextán prósent.

Björn Zoëga, forstjóri LSH, segir að fjárveitingar til spítalans hafi farið stiglækkandi allt frá árinu 2003, og áberandi mest hafi sú lækkun verið á milli áranna 2007 og 2008. „Ég skil mætavel þá erfiðu fjárhagslegu stöðu sem ríkið er í og spítalinn mun leggja sitt af mörkum í sparnaði. Mér finnst þó ástæða til þess að taka tillit til þeirrar hagræðingar sem náðst hefur á undanförnum árum og því þráláta gengistapi umfram forsendur fjárlaga sem LSH hefur orðið fyrir í fyrra og í ár.“ Gengistapið sem um ræðir er um þrír milljarðar króna.

Eins og áður sagði er mismunurinn á heildarfjárveitingum til heilbrigðismála annars vegar og til Landspítalans sérstaklega hins vegar um tuttugu prósent. Björn segir að rekstrarfé spítalans væri mun hærra í dag ef framlög til LSH hefðu þróast í samræmi við annað. „Tölurnar á bak við þetta tala sínu máli. Ef þróun fjárframlaga til LSH hefði verið með sama hætti og til annarra heilbrigðismála væri upphæðin sem við hefðum úr að spila í ár um 40,5 milljarðar en ekki í kringum 35 milljarðar. Þetta er varlega áætlað.“

Spurður hvort þessi mikli munur sé ekki tilkominn vegna tilfærslna innan heilbrigðiskerfisins segir Björn að það skýri ekki þennan mun. Í þessari umræðu komi tilfærsla svokallaðra s-merktra lyfja frá LSH til almannatrygginga ekki inn í myndina. Sú færsla hafi komið til á þessu ári og numið 3,2 milljörðum króna.

„Benda má á að þar til á þessu ári jókst starfsemi á spítalanum öll árin frá sameiningu Landspítalans og Borgarspítalans árið 2001. Í ár stendur starfsemin í stað.

Á þessum tíma hefur eitthvað verið um það að aðgerðir og þjónusta hafi flust til sjálfstætt starfandi sérfræðinga en það er óverulegt þegar allt er skoðað. Þetta hefur til dæmis verið staðfest í skýrslum Ríkisendurskoðunar um LSH og mælingum á framleiðslu vinnuafls.“svavar@frettabladid.is