Fyrrum forstjórar í framboði

Alls gefa níu kost á sér til setu í aðalstjórn Icelandair Group á hluthafafundi sem verður haldinn á morgun, 6. ágúst.

Þeir eru: Finnur Reyr Stefánsson, Friðrik Á. Brekkan, Geirþrúður Alfreðsdóttir, Hlíf Sturludóttir, Jón Ármann Guðjónsson, Jónas Gauti Friðþjófsson, Katrín Olga Jóhannesdóttir, Pétur J. Eiríksson og Sigurður Helgason.

Stærstu hluthafar í Icelandair Group eru Íslandsbanki, sem á 47 prósent í félaginu, skilanefnd Landsbankans, sem á um 24 prósenta hlut, og Sparisjóðabankinn, sem á um 10 prósent.

Samkvæmt heimildum Fréttablaðsins er Sigurður Helgason, fyrrum forstjóri Icelandair, og Katrín Olga á vegum Íslandsbanka, Pétur J. Eiríksson, fyrrum forstjóri Icelandair Cargo, á vegum skilanefndar Landsbankans og Jón Ármann á vegum Sparisjóðabankans.

Finnur Reyr sækist eftir setu vegna eigin hlutar í félaginu. Hann er jafnframt eini núverandi stjórnarmaður sem sækist eftir áframhaldandi setu. Hlíf Sturludóttur, Friðrik Á. Brekkan og Geirþrúður Alfreðsdóttir sækjast eftir stjórnarsetu vegna eigin hlutar í félaginu, samkvæmt heimildum Fréttablaðsins. Geirþrúður hefur verið flugstjóri hjá Icelandair og er dóttir Alfreðs Elíassonar, stofnanda Loftleiða.

- bþa