Þrír starfsmenn Rauða krossins fallnir á Sri Lanka

Þrír starfsmenn Alþjóða Rauða krossins hafa fallið í átökum stjórnarhers og uppreisnarmanna Tamíltígranna á norðurhluta Srí Lanka.

Rauði krossinn eru einu alþjóðasamtökin sem enn eru með starfsmenn á sínum snærum á átakasvæðunum á norðurhluta Srí Lanka. Greint var frá því í morgun að innfæddur starfsmaður samtakanna, þrjátíu og eins árs gamall starfamður, og móðir hans hefðu fallið í stórskotaliðsárásum en ekki mun vitað hvort þar var um að ræða skothríð stjórnarhers eða uppreisnarmanna Tamíltígranna. Tveir innfæddi starfsmenn Rauða krossins til viðbótar hafa fallið í átökum stríðandi fylkinga en tuttugu innfæddir starfsmenn samtakanna munu á þeirra vegum á bardagasvæðinu.

Í gær sögðu fulltrúar Rauða krossins að miklir bardagar hefðu komið í veg fyrir að skip á vegum samtakanna kæmist til hafnar til að flytja burt sjúka og særða almenna borgara frá átakasvæðinu. Óskað var eftir að skipið gæti komist til hafnar og betur yrði tryggt að hægt væri að flytja fólk um borð.

Fregnir hafa borist af því að á meðan ekki hafi verið hægt að sækja særða og flytja um borð í skipið hafi sprengjur skollið á bráðabirgðasjúkrahúsi og tugir fallið.

Sérfræðingar telja að átök eigi eftir að magnast enn frekar nú þegar hyllir undir log mánaðarlangra þingkosninga á Indlandi þar sem Tamílar eru fjölmennir. Síðustu kjörstöðum er lokað í dag og talning hefst um næstu helgi. Búist er við að stórsókn hefjist fljótlega eftir daginn í dag og stjórnarherinn reyni að ganga endanlega milli bols og höfuðs á uppreisnarmönnum Tamíltígranna og binda þannig enda á stríð sem geisað hefur í aldarfjórðung.

Óttast hjálparsamtök að mannfall meðal almennra borgara, ekki síst Tamíla, verði þá gríðarmikið.