Ökumenn í New York eru allra verstir

Ökumenn í New York hafa steypt ökumönnum í Miami úr toppsætinu yfir skapverstu ökumenn Bandaríkjanna.

Sú sérstaka könnun sem nær til erfiðustu og skapverstu bílstjóra Bandaríkjanna og er framkvæmd í 25 stórborgum þar kom út núna í morgun. Síðastliðin fjögur ár hafa bílstjórar Miami vermt toppsætið með nokkrum yfirburðum en nú varð breyting þar á. New York hirti sætið með glæsibrag og nú teljast ökumenn þar í borg allra ökumanna líklegastir til að steyta hnefann í átt að samborgurum sínum í umferðinni, flauta eða hleypa flaumi fúkyrða yfir manninn í næsta bíl.

Það er markaðs- og ráðgjafarfyrirtækið Affinion Group sem heldur utan um könnunina en engin takmörk virðast fyrir því hvað Bandaríkjamönnum dettur í hug að taka fyrir í könnunum sínum. Dallas í Texas fylgir fast á hæla New York en þar teljast næstdjöfullegustu bílstjórarnir og Atlanta og Minneapolis koma þar á eftir. Miami er sem sagt búin að bæta umferðarmenningu sína það mikið að þeir ná ekki einu sinni topp fimm á þessum sérstaka lista.

Aðstandendum könnunarinnar kom það helst á óvart að engin landfræðileg rök virðast ná yfir hegðun ökumanna, staðsetning þeirra verstu og bestu er í besta falli tilviljunarkennd. Að lokum má geta þess að sú háttsemi í umferðinni sem pirrar hinn almenna borgara mest er þegar ökumaðurinn situr og malar í símann í umferðinni - án handfrjáls búnaðar. Kannski eitthvað sem við Frónbúar ættum að hugsa út í annað slagið.