Ísraelar sakaðir um að beita krabbameinsvaldandi sprengjum

Norskur læknir segir Ísraela beita DIME sprengjum í hernaði sínum á Gaza ströndinni. Sprengjurnar eru með lítinn sprengjuradíus til að valda sem minnstu mannfalli, en valda þó sérlega alvarlegum áverkum. Þær innihalda þungmálma og hafa rannsóknir bent til þess að þær valdi krabbameini hjá þeim sem lifa þær af.

Ísraelar voru sakaðir um að beita sprengjunum í Líbanon og á Gaza ströndinni, en þeir hafa ávallt neitað því að eiga þær.

Mads Gilbert, sem er meðlimur í norsku læknateymi sem starfar á Al-Shifa sjúkrahúsinu á Gaza ströndinni, sagði í viðtali við írönsku sjónvarpsstöðina Press TV að flestir, ef ekki allir þeirra sem hann meðhöndlar bæru þess merki að hafa orðið fyrir þessari tegund sprengju.

Hann segir áhrifasvæði sprengjunnar lítið, um tíu metrar, en að hún springi með ógnarkrafti. Þeir sem fyrir henni verði hreinlega skerist í sundur. Þá segist hann gruna að meirihluta þeirra sem sem þó lifa sprenginguna af eigi eftir að þróa með sér krabbamein eða hvítblæði.

Læknirinn segir nær alla þeirra sem hann hefur meðhöndlað undanfarið verið með afskorna útlimi eftir slíkar sprengingar. Eftir sprengingu í gær hafi læknarnir meðhöndlað tíu ára dreng. Hann fannst með brjóstholið fullt af sprengjubrotum og afskorinn fót annars manns í fanginu. Ekki tókst að bjarga drengnum, sem lést í höndunum á læknunum.

Gilbert fordæmdi notkun sprengnanna í viðtalinu og biðlaði til ísraelskra kollega sinna að hvetja stjórnvöld til að hætta notkun þeirra. Hann sagði aðgerðir Ísraelshers á svæðinu hvorki standast alþjóðalög né almennt siðferði. Ekki væri hægt að koma svona fram við saklausa borgara.

„Bak við tölur yfir látna sem fjölmiðlar birta stöðugt er fólk, fjölskyldur, konur, ömmur, börn. Það er raunveruleikinn við þetta ástand," sagði Gilbert. „Þeir sem gjalda fyrir hernað ísraelsmanna er venjulegt fólk, palestínska þjóðin."