Hávaxnir karlmenn tekjuhærri í Ástralíu

Hávaxnir karlmenn eru almennt tekjuhærri en hinir lægri í Ástralíu. Það eru hagfræðingar við ríkisháskólann þar, sem hafa gert þessa merku uppgötvun og ekki nóg með það heldur hefur þeim tekist að reikna út eins konar hæðarverðskrá þar sem því er slegið föstu að hverjir fimm sentimetrar umfram 178 sentimetra hæð skili sér sem 950 ástralskir dollarar, 90.103 íslenskar krónur, í launaumslagið á ársgrundvelli.

Ekki fylgdi þó sögunni hvort jafnmikil launalækkun fylgdi að meðaltali hverjum fimm sentimetrum niður fyrir 178 sentimetrana. Andrew Leigh, sem stjórnaði rannsókninni, segir að eftir gríðarlegt grúsk í hæðarmælingum og launapælingum hafi það komið í ljós að óháð menntun, aldri, fjölskylduaðstæðum og bakgrunni almennt væri rétt hlutfall milli tekju- og líkamshæðar hjá karlmönnum landsins.

Hjá konum hefði þessi þáttur hins vegar reynst svo lítilvægur að hann hefði ekki tölfræðilegt gildi. Mörgum þátttakendum í rannsókninni kom það hins vegar á óvart, auk þess sem það olli þeim sárri gremju, að einn þáttur virtist ekki hafa nokkur einustu áhrif á launin en það var líkamsþyngd.