Ætla að stækka landnemabyggð Ísraela á Vesturbakkanum

Ísraelar eru að hrinda í framkvæmd áætlunum um stækkun landnemabyggða á Vesturbakkanum. Bandaríkjamenn hafa þegar fordæmt þessar áætlanir.

Verktakar fóru í gær til þess að skoða aðstæður í gamalli herstöð á Vesturbakkanum þar sem búið er að gefa grænt ljós á byggingu tuttugu íbúðahúsa.

Í gær kom svo Benjamín Netanyahu, forsætisráðherra Ísraels, til Bandaríkjanna þar sem hann mun eiga fund með Barack Obama, forseta.

Bandaríkjamenn hafa síðan árið 2006 þrýst á Ísraela að hætta við þessar byggingaáætlanir og má gera því skóna að Obama muni frekar ræða það mál við forsætisráðherrann.

Alþjóðadómstóllinn í Haag hefur lýst áætlanirnar ólöglegar. Síðan Ísraelar unnu sigur í sex daga stríðinu árið 1967 hafa þeir reist yfir eitthundrað landnemabyggðir á herteknu landi.

Það er bæði á Vesturbakkanum og í austurhluta Jerúsalem. Þar búa um hálf milljón gyðinga innan um yfir þrjár milljónir Palestínumanna.

Palestínumenn vilja fá austurhluta Jerúsalems sem höfuðborg sjálfstæðs ríkis síns. Ísraelar segja hinsvegar að Jerúsalem verði aldrei aftur skipt.

Benjamín Netanyahu segist vilja frið við Palestínumenn en hefur ekki gengið svo langt að ljá máls á sjálfstæðu ríki þeirra.

Hann segir að fyrst verði Palestínumenn að viðurkenna Ísrael formlega sem ríki gyðinga.