Uppreisnarher Tamíltígra leggur niður vopn

Uppreisnarher Tamíltígra hefur gefist upp í 25 ára löngu stríði sínu við stjórnvöld á Srí Lanka. Bauðst hann til að leggja niður vopn sín í gær eftir að stjórnar­herinn réðst af krafti inn í sterkasta vígi þeirra í norðausturhluta landsins.

Þegar íbúar Srí Lanka fréttu af enda­lokum stríðsins þyrptust þeir út á götur og fögnuðu gríðarlega. „Þessi sigur tryggir okkur betri framtíð fyrir komandi kynslóðir,“ sagði Prasanna Jayawardena, sem skaut upp flugeldum úti á götu. Mahinda Rajapaksa, forseti Srí Lanka, ætlar að halda blaðamannafund á þriðjudagsmorgun sem verður sýndur beint úr þinghúsi landsins þar sem hann lýsir því yfir að stríðinu sé lokið.

Selvarasa Pathmanathan, yfirmaður hjá Tamíltígrunum sendi út yfirlýsingu í gær þar sem hann lýsti yfir ósigri sinna manna. „Fólkið okkar er að deyja af völdum sprengna, skotárása, veikinda og hungursneyðar. Við verðum að koma í veg fyrir meiri skaða. Eini kosturinn okkar er að taka í burtu einu ástæðuna fyrir óvin okkar til að drepa okkur. Við höfum ákveðið að þagga niður í byssum okkar,“ sagði hann.

Alls hafa rúmlega sjötíu þúsund manns látist í stríðinu á Srí Lanka en á undanförnum mánuðum hafa um 250 þúsund almennir borgarar yfirgefið helstu átakasvæðin í landinu. Átökin hafa verið sérlega mikil á þessu ári og að sögn Sameinuðu þjóðanna voru sjö þúsund almennir borgarar drepnir og 16.700 særðust frá 20. janúar síðastliðnum til 7. maí. - fb