Obama styður Geithner þrátt fyrir undanskot hans frá skatti

Barack Obama, verðandi Bandaríkjaforseti, lýsir fullum stuðningi við Timothy Geithner, sem hann hefur valið í embætti fjármálaráðherra, þrátt fyrir að honum hafi orðið á mikil mistök þegar að hann sveikst undan því að greiða skatta. Þetta segir verðandi starfsmannastjóri í Hvíta húsinu.

Rahm Emanuel, verðandi starfsmannastjóri, sagði í sjónvarpsþættinum "Meet the Press" á sjónvarpsstöðinni NBC að Geithner hefði orðið á stórkostleg mistök, en hann væri rétti maðurinn í starfið. Hann nyti því fulls trausts Obama.

Hvort sem um mistök eða viljaverk var að ræða lúta meint brot Geithners að því að hafa ekki talið fram launagreiðslur til húshjálpar sinnar á skattaskýrslunni.

Obama sver embættiseið sem forseti Bandaríkjanna á þriðjudaginn.