Obama á ferðalagi um Mið-Austurlönd

Barack Obama Bandaríkjaforseti hóf tveggja daga ferð sína um Mið-Austurlönd með því að heimsækja Abdullah, konung Sádi-Arabíu, í gær. Abdullah og Obama ræddu saman stuttlega fyrir framan blaðamenn en héldu síðan til fundar.

Ferðin er hluti af tilraun Obama til að styrkja sambönd við múslímaheiminn. Obama sagði fjölmiðlum að honum þætti mikilvægt að koma á þann stað þar sem íslamstrú væri upprunnin, en heilögu borgirnar Mekka og Medína eru báðar í Sádi-Arabíu.

Þá sagðist Obama vilja fá ráð hjá konungi og ræða við hann um málefni Mið-Austurlanda. Hann sagðist enn fremur sannfærður um að löndin tvö myndu geta unnið saman að framförum og umbótum í mörgum málum.

Eftir heimsóknina til Sádi-Arabíu fór Obama til Egyptalands, en löndin tvö eru meðal mikilvægustu bandamanna Bandaríkjanna meðal arabaríkja.

Í Egyptalandi mun Obama í dag halda ræðu og ávarpa múslímaheiminn. Hann minntist á það í kosningabaráttu sinni að hann vildi ávarpa múslíma og breyta þar með áherslunum í samskiptum Bandaríkjanna við múslímaheiminn.

Osama Bin Laden tjáði sig um ferðalagið í gær og sagðist „sá fyrir hefnd og hatri“ múslíma á Bandaríkjunum.

Á morgun heldur Obama til Þýskalands þar sem hann mun funda með Angelu Merkel og á laugardag með Nicolas Sarkozy í Frakklandi. thorunn@frettabladid.is