McCain gerir aftur gys að Obama í nýrri auglýsingu

John McCain lætur ekki deigan síga í kosningabaráttunni við Barack Obama um bandaríska forsetastólinn og birti í dag nýja auglýsingu þar sem hann líkir Obama aftur við ofurstjörnur Hollywood. Áður hafði McCain gert auglýsingu sem líkti Obama við Paris Hilton og Britney Spears.

Í nýju auglýsingunni er spurt hvort „mesta dægurfluga [celeb] heimsins sé tilbúin til að hjálpa fjölskyldum" í Bandaríkjunum. Einnig er fullyrt að skattastefna Obama muni leiða af sér hærri skatta og meira atvinnuleysi.

Helstu aðstandendur kosningabaráttu Obama segja auglýsingaherferð McCain einkar ósmekklega. Þar auki sé farið með rangt mál í auglýsingunni því fólk Obama segir að verði hann kosinn muni skattar lækka hjá mun fleiri Bandaríkjamönnum en ef McCain sigrar forsetakosningarnar.

Hilton með betri orkustefnu en Obama

Þegar McCain gerði fyrst gys að Obama með því að líkja honum við dægurflugur á borð við Hilton og Spears voru margir sem hneyksluðust á framferði McCain og fannst slík umræða á ekki mjög háu plani.

Ein þeirra var sjálf Paris Hilton sem seinna svaraði með sínu eigin myndbandi. Sagði hún McCain „krumpaðan og gráhærðan mann“ og að hún væri alveg tilbúinn til þess að leiða Bandaríkin ef þess væri óskað.

Talsmaður McCain svaraði um hæl og sagði að þó Hilton væri ekki eins fræg og Obama þá væri orkustefna hennar klárlega betri.