Segir friðarviðræðum hafa farið aftur

Jimmy Carter, fyrrverandi Bandaríkjaforseti, segir friðarviðræðunum fyrir botni Miðjarðarhafs hafa farið aftur frá friðarráðstefnuni í Annapolis í Bandaríkjunum í nóvember í fyrra. Vandinn sé sá að Bandaríkjamenn og Ísraelar vilji ekki ræða við Hamas-liða.

Carter hefur verið á ferð um Miðausturlönd. Þar hefur hann fundað með ráðamönnum og einnig leiðtogum Hamas-samtakanna. Á föstudaginn fundaði hann með Khaled Mashaal, einum æðsta leiðtoga samtakanna, sem er í útlegð í Sýrlandi.

Stjórnvöld í Bandaríkjunum og Ísrael hafa gagnrýnt Carter harðlega. Hamas-samtökin eru á lista ríkjanna tveggja yfir hryðjuverkasamtök og það stefna þeirra að ræða ekki við þau. Ehud Olmert, forsætisráðherra Ísraels, neitaði að funda með Carter og það gerðu langflestir aðrir ísraelskir ráðamenn einnig en þó ekki Shimon Peres, forseti Ísraels.

Á blaðamannafundi í Jerúsalem í morgun sagði Carter að Hamas-liðar væru reiðubúnir að samþykkja það að Ísraelar mættu búa í sínu ríki við hlið Palestínumanna í friði eins og það var orðað. Carter sagði Hamas-liða ekki hafa hug á að grafa undan tilraunum Mahmouds Abbas, forseta Palestínumanna, til að semja um frið við Ísraela. Samtökin ætluðu heldur ekki að andmæla stofnun Palestínuríkis á Vesturbakkanum og Gaza-ströndinni.

Cater sagði það hins vegar vandamál að Ísraelar og Bandaríkjamenn neituðu að ræða við Hamas-liða sem yrðu að koma að samningaborðinu. Forsetinn fyrrverandi sagði friðarviðræðunum hafa farið aftur síðan friðarráðstefna var haldin í Annapolis í Maryland-fylki í Bandaríkjunum í nóvember í fyrra. Landtökubyggðir hafi stækkað, vegartálmum hafi fjölgað og fangelsið nærri landamærum Ísraela að Gaza stækkað.