Óttast að náttúruleg stífla í Kína bresti

Vatn er tekið að seytla gegnum náttúrulega stíflu sem myndaðist í Jianjiang-fljótinu í Sichuan-héraðinu í Kína þegar jarðskjálftinn varð þar 12. maí. Verkfræðingar hafa nú vökult auga með stíflunni sem er úr grjóti og jarðvegi en óttast er að hún bresti með ófyrirsjáanlegum afleiðingum.

Til að fyrirbyggja þetta hefur verið sprengd 475 metra löng rauf gegnum stífluna sem ætlað er að koma í veg fyrir að þrýstingur á hana aukist um of. Í gær hafði uppsafnað vatn fljótsins risið svo, að það átti rúman metra eftir upp að raufinni sem er efst á stíflunni.

Sérfræðingar hafa einnig áhyggjur af því að eftirskjálftar brjóti stífluna niður en fjórir slíkir mældust á síðasta sólarhring og var stærð þeirra á bilinu 4,5 til 5,3 stig. Þá er miklu regni spáð á morgun sem eðlilega hefur áhrif á vatnsmagn fljótsins.

CNN greindi frá.