Kenya Airways hættir flugi til Parísar

Kenya Airways hefur hætt áætlunarflugi til Parísar. Félagið segir ferðamenn frá Frakklandi hætta að koma til landsins í kjölfar ofbeldisöldunnar eftir úrslit forsetakosninganna í desember. Flugfélagið flaug þrisvar í viku til borgarinnar.

Í yfirlýsingu frá forsvarsmönnum félagsins segir að farþegafjöldi á flugleiðinni hrapað. Frakkar hafi virt viðvaranir frönsku ríkisstjórnarinnar um að ferðast ekki til Kenía. Í allt hefur farþegafjöldi flugfélagsins minnkað um 15 prósent.

Naíróbí er fyrsti áfangastaður margra Evrópubúa á leið til annarra Afríkulanda eins og Rúanda, Burundi, Seychelles eyja og Kongó.

Ákvörðunin gæti komið sér illa fyrir farþega á leið til frönskumælandi Afríkulanda, en Titus Naikuni framkvæmdastjóri félagsins segir þó að flugið verði vonandi hafið á ný fljótlega, fylgst verði með stöðunni.

Afleiðingar ofbeldisöldunnar hafa komið einna harðast niður á ferðamannaiðnaðinum í Kenía, en hann er ein arðbærasta tekjulind landsins. Stjórnendur í iðnaðinum óttast að hann muni þurrkast út vegna skorts á ferðamönnum.