Siniora mun gegna forsætisráðherraembættinu áfram

Meirihlutinn í líbanska þinginu samþykkti í gær að tilnefna Fouad Siniora í embætti forsætisráðherra að nýju. Það kemur í hlut hins nýkjörna forseta, Michel Suleiman, að skipa ráðherrann eftir tilnefningu frá þinginu. Siniora forsætisráðherra mun svo fá það hlutverk að mynda ríkisstjórn.

Siniora hefur verið forsætisráðherra í Líbanon síðan í júlí 2005. Hann nýtur stuðning Bandaríkjamanna og margra annarra vestrænna ríkja. Stjórnarandstæðingar úr röðum Hizbollah hafa hins vegar að undanförnu reynt að neyða hann til að segja af sér embætti.