Ungir jafnaðarmenn senda sendiherra Kína bréf

Vegna harkalegra aðgerða kínverskra stjórnvalda gegn stuðningsmönnum útlagastjórnar Tíbet færa Ungir jafnaðarmenn sendiherra Kína á Íslandi opið bréf klukkan 11 í dag. Í bréfinu spyr UJ áleitinna spurninga um hernám Kína í Tíbet og hvers vegna fjölmiðlum er haldið frá mótmælum gegn því.

Í tilkynningu frá UJ kemur fram að starfsmenn sendiráðsins hafi í gær sagst vera gríðarlega uppteknir og ekki geta svarað því hvort tekið yrði við bréfinu í dag. Þá hafi framkvæmdastjóri UJ vinsamlegast verið beðinn um að hringja aftur síðar, sem hann gerði ítrekað.

„Í morgun svaraði í sendiráðinu en engu að síður kom fram að sendiráðið væri í páskaleyfi og myndi opna aftur "einhvern tímann í næstu viku". Það yrði því enginn við í dag. Þetta kom þó ekki fram í fjölmörgum samtölum framkvæmdastjóra UJ við starfsmenn sendiráðsins í gær.

Þegar meðlimur UJ hringdi í dag og spurðist fyrir um vegabréfsáritun var honum sagt að sendiráðið tæki ekki á móti neinum en hann gæti þó komið og fengið áritun hringdi hann rétt á undan sér," segir í tilkynningu frá UJ.

Ungir jafnaðarmenn segjast þrátt fyrir þetta munu banka upp á í sendiráðinu klukkan 11 í dag og vonandi muni starfsmenn þess veita bréfinu mótttöku.