Versta útkoma Verkamannaflokksins í 40 ár

Breski Verkamannaflokkurinn beið afhroð í sveitarstjórnarkosningum sem fram fóru þar í landi í gær. Flokkurinn hefur ekki fengið verri niðurstöðu í slíkum kosningum í yfir fjörtíu ár.

Niðurstöður þar sem búið er að telja sína að íhaldsmenn hafa bætt við sig 144 sætum á meðan að Verkamannaflokkurinn hefur tapað álíka mörgume ða 145.

Brown kennir erfiðleikum í efnahagsmálum um

Niðurstöður kosninganna eru mikil vonbrigði fyrir Gordon Brown forsætisráðherra Bretlands og flokksfélaga hans í Verkamannaflokknum. Þegar hann ræddi við fréttamenn fyrir hádegi kenndi hann erfiðleikum í efnahagsmálum landsins meðal annars um slæma niðurstöðu.

Kjósendur vilji vera vissir um að ríkisstjórnin geti stýrt þjóðinni í gegnum erfiða tíma og vildi hann fullvissa þá um að aðgerðir á vegum ríkisstjórnarinnar til að ná tökum á ástandinu yrðu kynntar á næstu mánuðum.

David Cameron, formaður Íhaldsflokksins, og félagar hans hafa hins vegar haft ástæðu til að fagna í dag. Brown hefur þó nokkurn tíma til að jafna sig því hann þarf í síðasta lagi að boða til kosninga 2010.

Þrátt fyrir að niðurstöður kosninganna séu víða orðnar ljósar er enn mikil spenna í Lundúnum þar sem hart er barist um borgarstjórastólinn og verða tölur þar ekki birtar fyrr en í kvöld. Þar sækist vinstrimaðurinn Ken Livingstone - betur þekktur sem Rauði-Ken - eftir umboði kjósenda þriðja kjörtímabilið í röð.

Höfuðandstæðingur hans er íhaldsmaðurinn Boris Johnson, þingmaður, fyrrverandi ritstjóri og sjónvarpsþáttastjórnandi. Hann hefur getið sér orð sem léttlyndur stjórnmálamaður og því héldu margir að hann væri að grínast þegar hann gaf það út að hann ætlaði í slaginn. Síðan þá hefur honum vaxið ásmegin og hefur honum verið spáð sigri.