Ísraelar sleppa 200 föngum

Stjórnvöld í Ísrael slepptu í dag tvö hundruð palestínskum föngum úr haldi. Fangarnir fengu frelsi nokkrum klukkustundum áður en Rice utanríkisráðherra Bandaríkjanna lendir í Ísrael í þeim tilgangi að halda friðarferli Ísraela og Palestínumanna gangandi.

Fjölskyldur fanganna fögnuðu ákaft þegar ástvinir þeirra voru látnir lausir í Beituina, nálægt Ramallah á vesturbakkanum. Talsmaður Ísraelsstjórnar segir að ákvörðun um lausn þeirra hafi ekki verið auðveld því sumir þeirra hefðu átt þátt í árásum á óbreytta borgara í Ísrael.

Tveir fanganna voru settir í lífstíðarfangelsi fyrir morð á ísraelskum borgurum fyrir um þrjátíu árum. Langflestir fanganna sem fengu að fara heim í morgun voru þó teknir fyrir minni sakir. Alls eru um níu þúsund palestínskir fangar í haldi í Ísrael og velflestar palestínskar fjölskyldur eiga ættingja eða vini í ísraelsku fangelsi. Með fangalausninni vonast Ísraelsstjórn til að styrkja Mahmoud Abbas forseta palestínsku heimastjórnarinnar í sessi. Hann þarf að sanna fyrir þjóð sinni að friðarsamningar við Ísrael skili einhverju áþreifanlegu - á meðan hægt gengur í viðræðum um varanlegan frið.

Condoleeza Rice utanríkisráðherra Bandaríkjanna kemur til Ísraels í dag og vonast til að koma meiri hreyfingu á þær viðræður. Bush Bandaríkjaforseti vill samninga fyrir árslok - en flestir sem að viðræðunum koma viðurkenna að ólíklegt sé að hann nái því markmiði að koma á friði fyrir botni Miðjarðarhafs áður en hann fer frá sem forseti í janúar á næsta ári.