45 féllu í sprengingunum á Indlandi

Talið er að lítt þekktur hópur íslamskra öfgamanna hafi staðið að 17 sprengingum sem urðu 45 manns að bana í borginni Ahmedabad í vesturhluta Indlands í gær.

Sprengingarnar voru allar gerðar á sama klukkutímanum, einkum á mörkuðum, í íbúðahverfum og strætisvagnastöðvum. Sprengjurnar voru einfaldar naglasprengjur sem komð hafði verið fyrir í kössum og á reiðhjólum sem skilin voru eftir.

Forseti Indlands og forsætisráðherra hafa hvatt fólk til að sýna stillingu og heita því að tilræðismennirnir verði handteknir.

Í Ahmedabad hafa skærur milli Hindúa og Múslima áður kostað fjölda mannslífa - þar á meðal snemma árs 2002 þegar hundruð manna féllu.