Drogba ekki á förum

Peter Kenyon, framkvæmdarstjóri enska úrvalsdeildarfélagsins Chelsea, segir engar líkur á því að Didier Drogba sé á leið frá félaginu nú í janúar.

Enskir fjölmiðlar greindu frá því í síðustu viku að sést hafi til Drogba að snæðingi með fulltrúum ítalska úrvalsdeildarfélagsins Inter. Kenyon sagði í samtali við fréttastofu BBC að það skipti engu máli hvort það væri rétt eða ekki.

„Didier er samningsbundinn Chelsea næstu átján mánuðina og er ekki á förum í janúar," sagði Kenyon.

Drogba var frá í upphafi tímabilsins vegna meiðsla og er nú að taka út þriggja leikja bann fyrir að kasta smápeningi í áhorfendur er Chelsea tapaði fyrir Burnley í ensku deildarbikarkeppninni.

Kenyon sagði enn fremur að afar ólíklegt væri að Chelsea ætlaði sér út á leikmannamarkaðinn í janúar. „Þeir leikmenn sem við viljum fá er yfirleitt aldrei hægt að fá í janúar."