Enginn Dani dó í sprengingunni í Pakistan

Einn starfsmaður sendiráðsins lést af völdum sprengingarinnar í Islamabad í morgun og þrír særðust. Aðeins þrír danskir starfsmenn voru við störf þar og ekki er vitað til þess að þeim hafi verið meint af. Sendiráðsbyggingin sjálf skemmdist og nokkrar bifreiðar fyrir utan.

Grunur beinist helst að hryðjuverkasamtökunum al-Qaeda en liðsmaður samtakanna fordæmdi nýlega í myndbandi birtingar Múhammeðsmyndanna í febrúar.

Utanríkisráðherra Danmerkur Per Stig Møller telur árásina líklegast stafa af birtingu Múhammeðsmyndanna þar sem Osama Bin laden hefur áður hvatt til óeirða vegna myndanna. Í samtali við Berlingske fordæmir hann árásina og telur slæmt að hryðjuverkamenn grípi til slíkra ráða.