Segja golf auka lífslíkur verulega

Golf virðist vera býsna heilnæm íþrótt ef marka má rannsókn sem birtist í Scandinavian Journal of Medicine & Science og bendir til þess að dánartíðni golfiðkenda sé 40% lægri en samanburðarhóps með sömu breytur en þar er gengið út frá aldri, kyni og þjóðfélagslegri stöðu.

Telja rannsakendurnir, Anders Ahlbom og Bahman Farahmand við Karólínska sjúkrahúsið í Stokkhólmi, þetta jafngilda fimm ára viðbót við lífslíkur þeirra sem leggja stund á golf.

Skýra þeir þetta með því að golf sé íþrótt sem feli í sér mikla útiveru og hreyfingu sem sé hóflegri en tíðkist í mörgum öðrum íþróttum. Einn hringur á golfvelli feli í sér fjögurra til fimm klukkustunda dvöl undir berum himni og sex til sjö kílómetra rösklega göngu. Enn fremur benda rannsakendurnir á að hin félagslega hlið íþróttarinnar reynist mörgum holl.

Svo ítarleg er könnun þeirra Ahlboms og Farahmands, sem náði til 300.000 sænskra golfiðkenda, að þeir fullyrða einnig að þeir sem séu með lága forgjöf fái enn meiri heilsubót út úr íþróttinni en hinir sem hærri hafi forgjöfina.

Forgjöf er mælikvarði á hæfni iðkandans sem gerir tveimur eða fleirum með ólíka getu kleift að etja kappi svo samanburðarhæft sé. Því lægri sem forgjöfin er því hæfari er iðkandinn. Rökstuðningurinn fyrir því að lægri forgjöf stuðli að auknum lífslíkum er einfaldlega sá að golfiðkandi með lægri forgjöf ver meiri tíma á vellinum.

Bloomberg greindi frá.