Miklir skógareldar í miðhluta Svíþjóðar

Allt að þúsund hektarar af skóglendi stóðu í ljósum logum í Svíþjóð um helgina. Verst var ástandið norður af bænum Hassela í miðhluta landsins.

Skógareldarnir hófust á föstudag og breiddust fljótt út. Talsmaður slökkviliðsins sagði í samtali við Dagens Nyheter í morgun að enn væri ekki búið að ná stjórn á eldsvoðanum.

Enginn hefur slasast en nokkrar fjölskyldur hafa þurft að yfirgefa heimili sín. Yfir hundrað slökkviliðsmenn berjast við eldinn og nota þyrlur til að hella vatni yfir eldana.