Mannfall á Srí Lanka

Að minnsta kosti 20 féllu og 80 særðust þegar vegsprengja sprakk í úthverfi Kólombo, höfuðborgar Srí Lanka, í morgun. Strætisvagn ók hjá þegar sprengjan sprakk. Þetta var á háannatíma.

Stjórnvöld segja uppreisnarmenn Tamíltígra bera ábyrgð á ódæðinu. Nú rétt fyrir fréttir særðust sex til viðbótar hið minnsta þegar sprengja sprakk í strætisvagni í bænum Polgolla í miðhluta landsins. Talið er að Tígrarnir beri einnig ábyrgð á þeirri árás.

Stjórnarherinn hefur sótt af hörku gegn uppreisnarmönnum síðustu vikur og reynt að ná vígi þeirra í norðri á sitt vald. Hálft ár er frá því vopnahléssamningur stríðandi fylkinga fór út um þúfur og eftirlitssveitir Íslendinga og Norðmanna fóru úr landi.