Barton fékk tólf leikja bann

Joey Barton hjá Newcastle var í dag dæmdur í tólf leikja keppnisbann af enska knattspyrnusambandinu vegna árásar hans á fyrrum liðsfélaga sinn þegar hann var leikmaður Manchester City.

Helmingur leikjanna í keppnisbanninu eru skilorðsbundnir og því gæti Barton sloppið með sex leikja bann ef hann hagar sér vel í framtíðinni. Hann var auk þessa dæmdur til að greiða 25,000 punda sekt.

Bannið fær Barton fyrir að ráðast á þáverandi liðsfélaga sinn Ousmana Dabo í maí árið 2007 á æfingasvæði Manchester City.

Barton hefur nýlokið fangavist vegna líkamsárásar í Liverpool og er á skilorði vegna árásarinnar á æfingasvæði City í fyrra.